Tengsl við sögu héraðsins

Einkunnir koma fyrir í 86. kafla Egils sögu. En þar segir frá því að Steinar Sjónason ætlaði að sitja fyrir Þorsteini Egilssyni en Íri sem var leysingi Þorsteins og sá um fjárgæslu fyrir hann aðvaraði Þorstein.

           „Íri segir Þorsteini, að hann hefði farið upp á Einkunnir um daginn og séð til sauða – „en eg sá,“ segir hann, „í 
           skóginum fyrir ofan veturgötu, að skinu við tólf spjót og skildir nokkurir.“
           …

En það spurðist þó síðan að Steinar Sjónason hafði þann sama dag setið uppi við Einkunnir með tólfta mann. Þorsteinn lét sem hann hefði ekki spurt og var það kyrrt síðan.” (Egilssaga. 1999. Bls 232 – 233).

Innan fólkvangsins má greina tvennar tóftir, aðra við Háfsvatn og hina á Sauðhúsaborg. Það er hald manna að í gegnum fólkvanginn liggi forn þjóðleið, samanber frásögnina í Eglu og má greina leifar af henni við tóftina á Sauðhúsaborg.


Vorið 2015 skráði Fornleifastofnun Íslands minjar innan fólkvangsins. Hægt er að nálgast skýrlsu þeirra HÉR.